ភ្នំពេញ៖ ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចលោកស្រី ម៉ែន សំអន បានជួបសំណេះសំណាល និងបង្ហាញពីការយកចិត្តទុក្ខដាក់របស់រាជរដ្ឋាភិបាល និង ការការពារផ្នែកច្បាប់ ដល់មេការ និង អ្នកគ្រប់គ្រងនៅតាមសេវាកម្សាន្តចំនួន ៥ខណ្ឌ។

ក្នុងពីធីជួបសំណេះសំណាលនេះមានបុគ្គលិកបម្រើការងារសេដ្ឋកិច្ចក្រៅប្រព័ន្ធចំនួនសរុប ៥៩៨នាក់ មកពីខណ្ឌដូនពេញ ខណ្ឌចំការមន ខណ្ឌបឹងកេងកង ខណ្ឌ៧មករា និងខណ្ឌទួលគោក នៅមជ្ឈមណ្ឌលពិព័រណ៍កោះពេជ្រ នាថ្ងៃទី១៥ កុម្ភៈ ឆ្នាំ២០២៣។

លោកស្រីបានឱ្យដឹងថាក្នុងការជួបសំណេះសំណាលនេះ គឺជាការបង្ហាញអំពីការយកចិត្តទុកដាក់របស់រាជរដ្ឋាភិបាល ជាពិសេសបានផ្តល់មេធាវីការពារផ្លូវច្បាប់ក្នុងការការពារការរំលោភបំពាន និងការផ្តល់ប័ណ្ណ ប.ស.ស. ព័ណ៌លឿង ជូនដល់បុគ្គលិកបម្រើការក្នុងសេដ្ឋកិច្ចក្រៅប្រព័ន្ធ ផ្នែកសេវាកម្សាន្តទេសចរណ៍។

ជាមួយគ្នានេះ លោកស្រីក៏បានក្រើនរម្លឹកដល់ម្ចាស់អាជីវកម្ម និងមេការទាំងអស់ មិនត្រូវជឿតាមការឃោសនាដែលគ្មានប្រភពច្បាស់លាស់ និងជំរុញដល់អ្នកចូលរួមកម្មវិធីថ្ងៃនេះ ភ្ជាប់នូវតេឡេក្រាមរបស់សម្តេចតេជោ ដើម្បីទទួលបាននូវព័ត៌មានពិតប្រាកដ។

ក្នុងពិធីនោះលោកស្រី ម៉ែន សំអន បានផ្តាំផ្ញើដល់អង្គពិធីនូវការសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត នូវការនឹករលឹក និងការគិតគូរអំពីសុខទុក្ខរបស់ប្រជាពលរដ្ឋនៅគ្រប់ទីកន្លែង ព្រមទាំងបាននាំយកថវិការបស់សម្តេចទាំងទ្វេ តាមរយ:លោកឃួង ស្រេង ជូនដល់បុគ្គលិកបម្រើការងារ សេដ្ឋកិច្ចក្រៅប្រព័ន្ធ ចំនួន ៥៩៨នាក់ ក្នុងម្នាក់ៗទទួលបានថវិកា ១០ម៉ឺនរៀល។

គួរឱ្យដឹងដែរថា ក្រសួងទេសចរណ៍ចេញសេចក្តីណែនាំនៅថ្ងៃទី៣០ ខែមករា ឆ្នាំ២០២៣ ស្របតាមអនុសាសន៍របស់ សម្តេចតេជោ នាយករដ្ឋមន្ត្រីកម្ពុជា ដែលគិតគូរយកចិត្តទុកដាក់លើនារីដែលបម្រើសេវាកម្មកម្សាន្តធានាឱ្យពួកគេមានសុវត្ថិភាពក្នុងម៉ោងការងារ។ ជាមួយគ្នានេះ រដ្ឋាភិបាលក៏មានគំនិតក្នុងការផ្តល់មេធាវីការពារនារីបម្រើការងារក្នុងវិស័យសេវាកម្សាន្ត និងផ្តល់បណ្ណ ប.ស.ស. ដល់ពួកគេផងដែរ៕